Impasiguro ni Department of Agriculture (DA) Secretary Francisco Laurel Junior a tungpalen na iti nagbalin a direktiba ni Presidente Ferdinand Marcos Jr. iti maikauppat a State of the Nation Address na seknan iti panagkamat kadagiti traders wenno negosyante a maaggundaway kadagiti mannalon.
Impaganetget ti sekretaryo a nalawag iti nagbalin a pammilin ti Presidente ken impasiguro a saan a talnaan ti DA dagiti mangmanmanipula kadagiti presyo ti palay ken bigas, kasta met dagiti dadduma pay nga agricultural commodities.
Kas iti kinuna ni Presidente Marcos, sinegundahan na ken kinuna a maibilang dagiti nasao a kriminal nga aktibidad kas economic sabotage isu a kasapulan a mapagsungbat dagiti adda iti likudan dagiti panangallilaw iti publiko.
Iti maikauppat a SONA ni Presidente Marcos ket pinakdaaran na dagiti traders a panggep a mangpanipula iti presyo iti palay ken bigas ken kinuna a saan isuda a talnaan iti gobierno. Kabayatanna, nangipeksa met iti panagsuporta ti National Food Authority (NFA) para ti nasao nga addang.
