Pinilaanen ti Department of Migrant Workers (DMW) ti kaso a plunder ken graft ni sigud nga Overseas Workers Welfare Administration (OWWA) administrator Arnell Ignacio kasta met dagiti walo a kakadwa na seknan iti kontrobersyal a land acquisition deal nga aggatad ti aganay P1.4B.
Ti kaso a naipila idiay Office of the Ombudsman ket maak-akusaran ni Ignacio, dagiti dua a sigud na a deputies ti OWWA, ken dagiti innem a sabali pay a karaman iti nasao a negosasyon iti malversation of public funds.
Segun iti DMW, nagtaud ti kaso iti nagatang a 1.5 hectare a property asideg ti Ninoy Aquino International Airport Terminal 1 idi bulan ti Setyembre tawen 2024 a nairanta tapno temporario a pagnaedan dagiti agaawid nga Overseas Filipino Workers (OFW).
Nupay kasta, nakita met iti ahensya a ti puesto ket asideg la unay iti airport runway ken saan a mabalin a pangipasdekan.
Naammoan pay a saan gayam a nagpakonsulta kadagiti board of directors ti OWWA kasta met a saan pay a napalubosan iti panaggatang iti daga, deed of sale, ken dadduma pay a mainaig a dokumento.
