Impaganetget ti Sandiganbayan nga isuda iti addaan iti hurisdiksyon iti P600M graft case ti COVID-19 supply contract ti Pharmally Pharmaceutical Corporation, maisupadi iti immun-una a desisyon ti regional trial courts (RTC).
Iti maysa a 43-a-pinanid a resolusyon a nairuar idi Hulyo 21, imbatad ti Seventh Division ti anti-graft court a sakopen ti Republic Act No. 10660 ti nasao a kaso apo metten iti kinadakkel iti gatad ken dagiti akusado ket puro opisyales ti gobierno.
Maipalagip a dua a darasen nga imbasura ti ti RTC iti kaso – umuna ket idiay Manila RTC Branch 39 idi Setyembre 9, 2024 ken maikadua ket idiay Malolos RTC Branch 12 idi Disyembre 26, 2024 – gapo iti kinakurang ti hurisdiksyon.
Kinontra met daitoy ti Ombudsman ken pinatibker pay ti Sandiganbayan nga addaan ti umdas a pagbasaran tapno agtalinaed ti kaso kadakuada gapo iti indikasyon a nasurok P1M ti pinansyal a perdisyon na iti gobierno.
Pagaammo a nakasoan ti panaglabsing ti Section 3(e) ti Anti-Graft and Corrupt Practices Act dagiti sumagmamano nga opisyales ti Procurement Service-Department of Budget and Management (PS-DBM) kasta met dagiti executives ti Pharmally. Naakusaran da iti panagserrek iti P600M a kontrata a nalatak a pumabor iti kompanya para kadagiti COVID-19 testing kits idi Hunyo 2020.
Karaman kadagiti nakasoan nga opisyales ti gobierno ket isuda Lloyd Lao, Warren Liong, Christina Suntay, Augusto Ylagan, Jasonmer Uayan, Webster Laureñana, ken Paul de Guzman; ken dagiti Pharmally executives nga isuda Twinkle ken Mohit Dargani, Linconn Ong, Justine Garado, Huang Tzu Yen, Krizle Mago, ken ni Lin Weixiong.
Iti agdama ket agtultuloy latta a maim-imbestigaran dagiti sabali pay a kontrata ti PS-DBM iti Pharmally, karaman ditan dagiti dua nga aggatad ti P2.8B ken ti P688M.
Ti desisyon ket insurat ni Associate Justice Maria Theresa Dolores Gomez-Estoesta a pinermaan met da Associate Justices Georgina Hidalgo ken Zaldy Trespeses.
