Laksid iti panangpabor dagiti adu a kongresista a pabiagen manen iti Quad Committee ti Kamara de Representantes, impaganetget ni Bukidnon Representative Keith Flores a kasapulan pay a denggen ti makuna ti mayorya seknan ti panagsubli iti nabileg a komite.
Segun kenni Flores, baro a chairman ti House Committee on Dangerous Drugs a sigud nga indaulaon ni Surigao del Norte Representative Robert Ace Barbers, a ti QuadComm ket nabukel idi 19th Congress ken otomatiko a nagibus idi nangrugi ti 20th Congress.
Nupay adu iti naaramidan ti nagtitipon a komite, kasapulan pay nga ikonsidera ti boses ti nakaadadu a mamanday-linteg nu maidatag manen iti kolaborasyon dagiti uppat nga House Committees.
Kabayatanna, kas baro nga House Dangerous Drugs Committee chair, agtalek ni Representative Flores a natibker ti kampanya ti agdama nga administrasyon kontra ilegal a droga, pangiyarigan kunana iti panangsukimat kadagiti dadakkel a suppliers kas ti matiltiliw kadagiti kallabes a police operations.
Inrekomendar na met iti kapulisan a malaksid kadagiti suppliers ken daddakkel a drug personalities, ket ipamaysa da met iti panangtaming kadagiti street-level drug personalities gapo iti pannakainaig da iti drug retailing.
