Pinasingkedan ni Armed Forces of the Philippines (AFP) chief General Romeo Brawner Junior a panggep ti Pilipinas a gumatang ti ad-adu pay a military equipment manipud pagilian nga India.
Segun iti AFP chief, nangangato ti kaledad dagiti arawaten pang-militar manipud India ken saan may unay a nangina a kas kadagiti sabali a pagilian. Saan na met a dinakamat dagiti nasao a military equipment gapo metten kadagiti security reasons.
Kabayatanna, madaman iti panagproseso ti India iti panangipatulod da ditoy pagilian kadagiti dua a sets ti BrahMos cruise missile systems a ginatang ti Pilipinas ken nakatuding a sumangpet inton sumaruno tawen.
Dagitoy missile systems ket paset ti P18.9B-contract para kadagiti tallo a BrahMos cruise system batteries idi Enero 2022 babaen ti administrasyon ni sigud a Presidente Rodrigo Roa Duterte.
Naipatulod metten ditoy Pilipinas dagiti immuna a BrahMos batteries idi bulan ti Abril ti napalabas a tawen.
