Aprobadon ti Department of Education (DepEd) ti P24K a tinawen a subsidiya para kadagiti mannururo ti pangpribado a pagadalan a nangatngato iti P6K manipud iti agdama nga P18K salary subsidy.
Manipud ita a school year 2025-2026, makaawaten dagiti kwalipikado a mannursuro iti P24K a subsidiya babaen ti Teachers’ Salary Subsidy component ti Government Assistance to Students and Teachers in Private Education (GASTPE) program.
Tapno agbalin a kwalipikado, nasken a sika ket lisensiyado a mannursuro, full-time ti employment status iti pangisursuruan a pribado a pagadalan, ken rumbeng ket addaan ti linawas nga tallo oras ti Educational Service Contracting (ESC) classes.
Ti nasao a panagngato ti subsidiya ket maysa kadagiti prayoridad a reporma ti edukasyon a dinakamat ni Presidente Ferdinand Marcos Jr. iti maikauppat a State of the Nation Address na.
Segun met kenni Education Secretary Sonny Angara, daitoy nga addang ket panangbigbig iti kontribusyon dagiti mannursuro ti pribado a pagadalan kas napateg a katulongan ti sektor ti edukasyon.
Pagaammo a karamanen iti panagngato ti subsidiya iti singasing a pondo ti ahensya para inton sumaruno a tawen.
