Nakaragsakan ni Energy Secretary Sharon Garin iti desisyon ti Korte Suprema a nanagwaswas iti panagsingir kontra kadagiti pribado a contractor ti Malampaya Natural Gas Project.
Segun kenni Garin, makanayon daitoy iti talek ken kinasigurado kadagiti gangganaet nga agpuonan iti sektor ti enerhiya.
Manipud iti desisyon a nairuar idi Hulyo, pinasingkedan ti Korte Suprema na karamanen iti 60% a paset ti gobierno manipud iti biruk ti proyekto ti income tax dagiti contractor.
Daitoy ket maisupadi iti immun-una a desisyon ti Commission on Audit (COA) a mangpapabayad iti P53B kadagiti contractors kas iti Shell Exploration B.V., PNOC Exploration Corporation, ken Chevron Malampaya LLC.
Innayon ni Garin a nalawag itan iti allagaden maipapan ti panagbuis kadagiti contractors isu nga agbalinen a silulukat ti Pilipinas kadagiti baro nga investors ti oil ken gas exploration.
