Immapela ni Senate President Pro Tempore Jinggoy Estrada ti sibubukeagsungbatan ti siasinoman a nagbasol iti narsuod a Cabagan- Sta. Maria Bridge — maysa a proyekto nga aggatad ti nasurok ₱1.2-B.
Dismayado ni Estrada a kalpasan ti lima a bulan ket ti laeng driver ti dump truck ti maipakulong ti Department of Public Works and Highways (DPWH).
Segun iti mamanday-linteg, awan ti naisubmitir a detalyado a panangilawlawag iti bridge designer a ni Mr. Alberto Cañete ken dagiti joint venture contractors nu kasatno da a nadesisyunan ti naisangsangayan a disenyo ti 990-meter bridge.
Kas maibasar iti waragawag ti DPWH ket awan ti kapada daitoy a disenyo mapa-lokal man wenno international projects.
Kinuna met ti Special Committee Report ti DPWH, nairekomendar a mapilaan iti maiyannatop nga aksyon iti design consultant ken contractor, nupay kasta ket impaganetget ni Estrada a nasken ket saan laeng nga isuda iti mapagsungbat.
