Nakailista ti Japan ti kabaroan a 17 heat record a kabaraan a panawen idi Lunes, Agosto 4, segun iti Japan Meteorological Agency (JMA).
Daitoy ket paset paylaeng iti agtultuloy a kalgaw iti nasao a pagilian a nangrugi idi Hunyo agingga Hulyo.
Maysa ditoyen iti ili ti Komatsu, Ishikawa a dimmanon ti agingga 40.3°C ti temperatura — kangatoanen a nairecord da sadiay.
Idiay met Toyama City ket dimmanon da ti 39.8°C – kabaraan metlaeng iti pakasaritaan ti lugar manipud idi nangrugi iti monitoring ti Japan.
Segun iti JMA, 15 pay nga ili ken ciudad idiay Japan ti nakailista kadagiti kabaroan a high temperatures manipud 35.7°C agingga 39.8°C.
Idi laeng Hulyo 30 ket nairecord pay ti kangatoan a temperatura iti pakasaritaan ti Japan a dimmanon ti agingga 41.2°C idiay Hyogo.
Ti nakaro a kalgaw ket kasaruno ti nasapa a panagleppas ti panagtutudo kadagiti makin-Laud a rehiyon, agarop tallo a lawas a nasapsapa ngem iti normal.
Bimmaba ti lebel ti danum kadagiti dam iti makin-Amianan a paset ti Japan a nangigubuay ti panagdanag kadagiti mannalon. Malidayan da ita gapo ti kinakurang ti padanom ken nababa nga apit.
Segun kadagiti eksperto, nasapa a nagsabong dagiti cherries ken ti niyebe idiay Mount Fuji ket natantan agingga Nobyembre — kabayagan metlaeng iti pakasaritaan da. Nagpakdaar ti ahensya iti publiko nga agtultuloy iti pangta ti sobra a bara na kadagiti sumaganad a bulan, gapo metten iti climate change,
Manipud iti global data ti NOAA (US National Oceanic and Atmospheric Administration), ti Asia ket maysa kadagiti kontinente nga addaan iti kapartak a panagngato ti temperatura manipud idi 1990, sumarsaruno laeng iti Europa.
