Imbestigaran ti National Police Commission (Napolcom) dagiti sumagmamano a police generals para ti posible a pannakairaman da ti kaso dagiti missing sabungeros.
Kinuna ni Napolcom Vice Chairperson ken Executive Officer Attorney Rafael Calinisan a tuloy-tuloyen iti imbestigasyon da ken saan laeng a limitado daitoy kadagiti 18 a pulis a ninaganan ti maysa metlaeng nga akusado ken whistleblower a ni Julie Patidongan alyas Totoy iti detalyado na a complaint affidavit.
Segun kenni Atty. Calinisan, manipud iti 18 a bilang dagiti pulis ket 12 kadagitoy ti aktibo iti serbisyo bayat a naikkat met dagiti innem a sabali pay.
Adda met dagiti nagan ti pulis a nangato ti ranggo da ti saanen a naipubliko pay kabayatan a madama iti imbestigasyon.
Inwaragawag ni Atty. Calinisan a kas maiyannurot iti direktiba ni Presidente Ferdinand Marcos Jr. ket nainget da nga imbestigaran ti pannakapukaw dagiit mammallot, partikular iti posibilidad a pannakairaman dagiti kameng ti linteg.
Maipalagip nga idi aldaw ti Lunes ket napaulogan ti 90 nga aldaw a suspensyon dagiti 12 nga aktibo a pulis.
Dagiti 11 a pulis ket sumangsango iti reklamo para ti kaso a “grave misconduct and conduct unbecoming of a police officer” bayat a ti maysa met a ni Colonel Jacinto Malinao Jr., sigud a director ti Batangas Provincial Police Office ket maim-imbestigaran metlaeng para ti kapada a reklamo, malaksid pay iti grave neglect of duty.
