Nagtungpal iti disgrasya ti panagpasyar idiay Hong Kong ti maysa a turista a Pilipino.
Pinasingkedan ti Department of Foreign Affairs (DFA) kas maibasar ti impadamag ti Consulate General ti Pilipinas idiay HK iti pannakatay ti 35-anyos a Pilipino a turista kalapsan a madungpar ti maysa a taxi idiay Tsuen Wan West idi Agosto 5.
Nangipadanon metten iti pannakiladingit ti Consulate General para ti naibati a pamilya ti Pilipino nga agdama itan nga adda sadiay Kwai Chung Public Mortuary.
Tarigagay ita ti Konsulada a mangipadanon ti tulong kadagiti naibati ti biktima ken agturong met ti pamilya na idiay Hong Kong tapno i-areglo ti pannakaiyawid ti bangkay daitoy.
Maibasar iti inisyal nga imbestigasyon, napukawan ti preno iti taxi ken nadungpar na iti turista a Pilipino a kalkalpas laeng a nagcheckout idiay Nina Hotel.
Kabayatanna, impadamag pay ti DFA nga adda ita iti kustodiya ti Hong Kong Police Force ti taxi driver ken makikokoordinar da metten para ti imbestigasyon ti kaso.
