Nakitaripnong ni Israeli Prime Minister Benjamin Netanyahu iti security cabinet na tapno dakamaten ti plano ti Israel Defense Forces (IDF) nga in-inut a sakopen ti Gaza City, laksid ti nakaro a panagkondenar ti sangalubongan a komunidad iti kumarkaro a humanitarian crisis iti rehiyon.
Segun iti maysa nga opisyal ti Israel, kiniddaw ni Netanyahu iti gabinete na nga aprobaran ti addang a naan-anay a panagsakop iti intero a Gaza Strip.
Nadakamat met iti kapada a plano iti tallo nga oras a pannakitaripnong ni Netanyahu kadagiti limitado a security cabinet na idi aldaw ti Martes.
Tarigagay ni Netanyahu a palawaen ti operasyon idiay Gaza agsipud ta mamati isuna a saan nga interesado ti terorista nga Hamas iti kabaroan a katulagan iti panangwaya-waya kadagiti kautibo.
Kabayatanna, idi nadamag met ti U.S. State Department mainaig iti posible a panaglawa ti opensiba, kinuna ti pannakangiwat da a ni Tammy Bruce a saan da nga ik-ikkan iti kabukbukodan da nga interpretasyon ti plano ti sabali a gobierno ngem agtalinaed da latta iti panggep da a mawayawayaan amin a kautibo ken masiguro a saanen nga idauloan pay ti Hamas ti Gaza.
