Nakasangpeten ni Presidente Ferdinand R. Marcos Jr. idi rabii ti Biernes ditoy Pilipinas kalpasan iti produktibo a 5-day inaugural state visit idiay India.
Iti arrival message na ket agtalek ni Presidente Marcos a ti panagrang-ay ti relasyon ti Pilipinas ken India, a maysa itan nga strategic partner, ket makaipaay ti kinakapia ken seguridad para iti nalawlawa nga Indo-Pacific region.
Selyadon ti pakabuklan a 18 a business agreements kabayatan ti bisita, buklen daitoy dagiti real investments nga aganay $146M ken nangigubuay pay iti interes para iti potensyal a kanayunan a $5.8B.
Kinuna iti presidente a dagiti napermaan a katulagan ket pakairamanan dagiti commitments para ti digital upskilling nga addaan nagtipon a gatad ti $11M.
Mapatta-patta a mang-ensayo daitoy ti aganay 26,120 a Pilipino para ti tay-ak ti artificial intelligence (AI) inton tawen 2026 kasta met iti digital technologies ken cybersecurity tapno agbalin da a “competitive ken future-ready workforce.”
Innayon ni Presidente Marcos nga isuna ken ni Indian Prime Minister Narendra Modi ket nangipeksa iti nainget a kolaborasyon para iti panagrang-ay ti digital infrastructure ti Pilipinas kasta met iti space cooperation.
Inwaragawag na pay iti anunsyo ni Modi a maka-apply itan dagiti Pilipino ti libre a tourist e-visas nga agturong idiay India, kasaruno metten iti panangtulad da iti 14-day visa-free entry para kadagiti turista nga Indian a sumrek ditoy Pilipinas.
