Indeploy ti Philippine Coast Guard (PCG) ti Islander aircraft tapno i-monitor ken i-challenge agiti barko ti China Coast Guard (CCG) nga adda iti kabaybayan a masakopan ti Batanes.
Impadamag ni PCG spokesperson for the West Philippine Sea (WPS) Commodore Jay Tarriela nga aktibo a banbantayan ti PCG dagiti tallo a barko ti CCG nga addaan iti bow number a 3304, 3301, ken 4304 iti kabaybayan ti Batanes manipud pay idi aldaw ti Huebes kalpasan metten a masaripatpatan dagitoy iti Dark Vessel Detection system manipud Canada.
Kasaruno dagiti irregular a garaw dagiti barko ti China, impatulod ti PCG ti Islander aircraft tapno mangisayangkat ti Maritime Domain Awareness (MDA) patrols iti makin-Amianan a rehiyon tapno i-challenge ken idokumento dagiti ar-aramiden da.
Idi masukimat ti lokasyon ti CCG 4304, dagos a nag-isyu ti radio challenge ti PCG crew ken impaganetget nga awan ti legal nga otoridad dagiti nasao a barko nga mapan iti exclusive economic zone ti Pilipinas, mapatta-patta a dumanon ti 75 nautical miles laud iti kosta ti Sabtang, Batanes.
Kabayatanna, saan met a nakaasideg ti PCG aircraft iti lokasyon ti CCG vessel 3304 ken 3301 gapo iti dakes a paniempo kasta met iti adayu la unayen a distansya dagitoy.
Laksid iti insidente ket impasiguro ti PCG iti kinasagana da a mangideploy kadagiti resources apaman nga agtuloy latta iti presensya dagiti nasao a babarko wenno umasideg pay lalo iti kosta ti Batanes.
Impasiguro da masalakniban ti kabaybayan ti Pilipinas ken mangaramid ti maiyannatop nga addang kontra kadagiti aglabsing ti maritime jurisdiction ti Pilipinas.
