Inyanunsyo ni U.S. Attorney General Pam Bondi idi aldaw ti Huebes (aldaw idiay Amerika) nga impangaton iti Estados Unidos ti aganay $50M ti reward money para ti aniaman nga impormasyon a makaitudo ken mangitunda ti pannakaarestar ni Venezuelan President Nicolas Maduro gapo iti pannakairaman na kadagiti aktibidad ti drug trafficking ken pannakikunsabo kadagiti kriminal a grupo.
Partikular nga inakusaran ni Atty. Bondi ni Presidente Maduro a makikikoordinar iti nalatak a sindikato kas iti Tren de Aragua ken ti Sinaloa Cartel.
Inawagan met ti Venezuelan Foreign Minister a ni Yvan Gil daitoy nga addang kas “the most ridiculous smokescreen ever seen.” Iti post na ti social media ket imbatad ni Gil a paset laeng daitoy iti “media circus” ti Estados Unidos tapno maparagsak ti oposisyon ti politika idiay Venezuela.
$15 million ti immun-una a naituding a reward money idi panawen ti pandemya, tawen 2020, kasaruno ti panangakusar ti U.S. prosecutors kenni Maduro iti drug trafficking. Nanayunan pay daitoy iti $25M idi Enero agdama a tawen, karaman ditan ti kabaroan a sanctions konntra kadagiti dadduma nga opisyales ti gobierno idi nagsapata ni Maduro iti maikatlo a termino na.
Idi Pebrero ket indeklara kas foreign terrorist organization ti U.S. State Department iti Tren de Aragua, kasaruno ti MS-13 ken sumagmamano a Mexican cartels; idi met Hulyo, nainayon metten iti listaan dagiti global terrorist organizations ti Cartel de Los Soles.
Segun kenni U.S. Secretary of State Marco Rubio, ni Maduro iti lider ti Cartel de los Soles ti nasurok maysa a dekada. Ti kartel ket adda pakainaganna kadagiti insidente ti panagpuslit ti ilegal a droga idiay Estados Unidos.
