Impasigurado ti Russia nga ipaayan da ti nainget a panagamiris iti peace deal iti nagbaetan ti Armenia ken Azerbaijan nga indauloan ti Estados Unidos.
Iti dasig ti kaalyado ti Russia nga Iran ket nainget a kinontra iti plano ti maysa a baro a border corridor a suportado ni U.S. President Donald Trump.
Daytoy ket mainaig ti katulagan a napermaan idiay Washington idi Biyernes, Agosto 8, nga addaan panggep a gibusan iti nabayagen a susik iti nagbaetan ti Armenia ken Azerbaijan.
Karaman kadagiti probisyon ti katulagan iti panangipasdek ti maysa a transit corridor a mangisilsilpo iti Azerbaijan ken iti exclave daytoy a Nakhchivan, maysa a nabayagen a kidkiddawen a proyekto ti Baku.
Iti America ket maaddaan ti karbengan nga agdevelop ti corridor a naawagan kas “Trump Route for International Peace and Prosperity” a kinontra met ti pagilian nga Iran.
Segun kenni Akbar Velayati, tagabalakad ni Iranian Supreme Leader Ayatollah Ali Khamenei, mabalin daytoy a mangipaay ti peggad iti seguridad ti rehiyon ken impaganetget a saan a mapasamak iti nasao a proyekto.
‘An impossible notion and will not happen,’ kenuna ni Velayati.
Kabayatanna, kenuna met ti Moscow a kasapulan da pay nga adalen a nasayaat dagiti detalye ti katulagan, kangrunaan iti isyu ti corridor.
Segun kenni Maria Zakharova, tagapagsarita ti Russian Ministry of Foreign Affairs, adda dagiti katulagan nga agraraira iti nagbaetan ti Russia, Armenia, ken Azerbaijan, isu ta saan pay a nalawag no kasano daytoy a makaapektar iti baro a katulagan.
Numanpay maragsakan iti Azerbaijan ken Armenia iti addang ti Estados Unidos, adda dagiti analyst iti nakadillaw iti kinakurang dagiti detalye ken posible a lapped iti implementasyon ti katulagan.
Mamati dagitoy nga iti katulagan ket mangipakpakita laeng ti maipagarop a panagbagsak ti impluwensya ti Russia iti rehiyon, gapo ti gubat idiay Ukraine.#
