Pormalen a sinukatan ni Senator Francis “Kiko” Pangilinan ni Senador Robinhood Padilla kas chairperson ti Senate Committee on Constitutional Amendments and Revision of Codes.
Inaprobaran ni Senate President Pro Tempore Jinggoy Estrada ti mosyon ni Senate Deputy Majority Leader JV Ejercito idiay plenaryo a para ti panangiggem ni Senador Pangilinan iti nasao a komite ken awan uray maysa a senador iti kimmontra.
Ni Senador Pangilinan ket maysa metlaeng nga abogado ken maipalagip nga indauloan na idin iti nasao a komite.
Kinuna ti Senador a ti konstitusyon ket nagtaud kadagiti umili ken siasinoman a mangayat a mangbaliw daitoy ket kasapulan pay a maipasidong iti nainget a panagadal.
Sakbayna ket nangipila met ni Senador Robin ti resolusyon a kumidkiddaw para iti panagrebisar ti 1987 Constitution babaen iti constitutional convention wenno Concon.
