Pinaregta ni Senador Panfilo “Ping” Lacson iti Malacañang a palawaen pay ti sakop ti “Sumbong sa Pangulo” website tapno saan laeng a dagiti flood control projects ti karaman nu di ket mainayon pay dagiti dadduma a maanomalya nga infrastructure projects ti intero a Pilipinas.
Kalpasan a maibutaktak dagiti ghost projects, defective infrastructures, ken sub-standard facilities, naglayos pay dagiti sumagmamano a reklamo iti nasao a website.
Segun iti senador, dakkel iti naitulong ti website ti panangibutaktak kadagiti ghost projects ken panangbigbig kadagiti 15 a contractors a nangkobra ti aganay 20% a pakabuklan a gatad dagiti flood control contracts.
Gapo iti daitoy ket kiniddaw na a mairaman iti website dagiti sabali pay a proyekto kas kadagiti kalsada, rangtay, flyoverss, ken dadduma pay nu kasta ket maitandudo iti transparency ken accountability.
Dinakamat ti senador nga arig agbalbalin nga inaccessible ti website ti Department of Public Works and Highways (DPWH) tunggal adda iti budget deliberations wenno kontrobersiyal nga isyu, banag a pagduduaan na nga igag-gagara ti ahensya.
Iti biang met ti Malacañang, kinuna ni Undersecretary Claire Castro a sangailien da iti kiddaw ni Senador Lacson ken innayon a silulukat ti administrsyon ti aniaman nga impormasyon a makatulong a mangibutaktak kadagiti kinakusit ti dagiti pampubliko a proyekto.
Maipalagip a naiyuswat idi Agosto 11 agdama a tawen ti “Sumbong sa Pangulo” website tapno pangipulongan iti publiko dagiti iregularidad kadagiti lokalidad da, ekslusibo a para laeng kadagiti flood control projects. Umuna paylaeng a lawas na ket dimmanon a dagos ti aganay dua a ribo dagiti nangipablaak ti reklamo da. Nu bisitaen iti website, makita amin nga impormasyon agingga lokasyon, kontratista, halaga, ken completion date ti tunggal proyekto.
