Rugyanen ti Commission on Elections (COMELEC) iti panag-imprenta dagiti opisyal a balota para iti Bangsamoro Parliamentary Elections (BPE) inton Setyembre 8 iti National Printing Office idiay Quezon City.
Segun kenni COMELEC Chairman George Erwin Garcia, umabot iti nasurok 2.3 million a balota iti maimprenta ken namnamaen a malpas iti las-ud ti pito nga aldaw karaman iti proseso ti beripikasyon.
Maibasar iti report ti Project Management Office ti poll body, intantan iti panag-imprenta tapno masukimat a nasayaat iti linteg. Sinigurado ni Garcia a saan daytoy a narigat agsipudta agarup 2.3M laeng a balota ti masapol. Nangituding dan iti kanayunan a tao idiay National Printing Office tapno mapapartak iti proseso ti beripikasyon.
Naitantan iti umuna nga iskedyul ti panag-imprenta kalpasan a makaawat ti impormasyon iti opisina da nga mabalin a maapektaran iti ballot face template gapo iti singasing-linteg a mangredistribute kadagiti pito a parliamentary seats.
Kasaruno ti desisyon nga iyakar ti Korte Suprema iti Sulu ken saanen a maibilang idiay Bangsamoro region.
Mainaig ti daytoy, addaanen ti adjusment iti deployment dagiti election paraphernalia gapo iti napasamak a panagiyakar. Masapol pay iti 12 nga aldaw tapno mai-reconfigure wenno maiyurnos dagiti mausar a Consolidated Canvassing (CCS) nga importante iti panangawat ti boto dagiti Automated Counting Machines.
Sinigurado met ni Garcia kadagiti taga-Bangsamoro a matuloy iti parliamentary elections inton Oktubre 13. (Bombo Emil John Panelo)
