Suportado ni Philippine National Police (PNP) Chief Police General Nicolas Torre III ti pannakaipasa ti linteg a mangipababa ti tawen para ti criminal liability nu laketdi addaan daitoy ti sientipiko a pagbasaran.
Kinuna ti hepe a mangited ti pormal a posisyon ti PNP mainaig iti isyu babaen ti written document nga ipadanon da met idiay Kongreso.
Daitoy ti wagas da a mangipeksa ti opinyon nangruna nu mabaliwan ti linteg nga adda pakainaiganna kadagiti agtutubo.
Innayon met ti hepe ti kaadda dagiti siyentipiko a panagadal a kasapulan da nga ikkan iti konsiderasyon mainaig iti limitasyon ti tawen ken ti puot dagiti agtutubo nangruna ita a panawen ti digitalisasyon ken adda iti access da kadagiti amin a klase ti impormasyon.
Kabayatanna, malaksid kadagiti ebidensya a naibasar iti panagadal ken siyensya ket impaganetget pay ni Torre a nasken pay nga ikonsidera ti kapada a panagadal mainaig met iti Republic Act 9344 wenno ti Juvenile Justice and Welfare Act.
