Dagos a binilin ti Department of the Interior and Local Government dagiti LGUs iti intero a pagilian nga agtignay partikular kadagiti lugar a direkta a naapektaran ti magnitude 6.9 a gingined idiay Cebu.
Panggep daytoy a direktiba a masigurado iti kinatalged ken pagimbagan dagiti tattao kadagiti apektado a komunidad.
Kas paset iti direktiba, imbilin ti DILG nga amin a Local Disaster Risk Reduction and Management Councils (LDRRMCs) ket rumbeng nga agtataripnongen ken agorganisa tapno marugyan iti koordinasion dagiti operasion.
Kasupalan met nga i-activate iti Emergency Operations Centers (EOCs) ken iti Incident Management Teams (IMTs) tapno agserbi kas sentro ti komunikasion ken panagaramid ti desision iti panawen ti krisis.
Napagtignay metten ti Barangay Disaster Risk Reduction and Management Councils (BDRRMCs) kadagiti apektado nga lugar.
Malaksid ditoy ket rumbeng met nga maipangruno iti pannakaisayangkat ti rapid damage assessment kadagiti kangrunaan nga imprastruktura kas kadagiti kalsada, rangtay, pasdek ti pagadalan, ospital, ken dadduma pay a napateg a pasilidad.###
