Simmukon iti National Bureau of Investigation dagiti dua kadagiti lima a suspek a nangpapatay kenni Philippine Charity Sweepstakes Office Board Secretary Wesley Barayuga.
Personal a simmuko iti naikkat a sigud a pulis a ni Nelson Mariano iti NBI Organized Transnational Crime Division idi Lunes bayat a ni Santie Mendoza ket simmuko idi Martes iti opisina ti NBI Ilo-ilo.
Segun ti NBI, napateg iti testimonia dagiti dua gapu ta nagserbida a middlemen nga addaan ti pakainaigan iti direkta nga utek ti krimen.
Agdama nga iggem ti NBI head office da Mariano ken Mendoza bayat nga maur-uray iti commitment order ti korte.
Maipalagip a nangiruaren ti warrant of arrest kontra kada sigud a PCSO general manager ken retired police colonel a ni Royina Garma, former National Police Commission Commissioner Edilberto Leonardo, ken ti polis a ni Jeremy Caapit gapo iti panangpatay kenni Barayuga idi 2020.
Makikokoordinaren iti NBI iti International Police Organization wenno Interpol tapno biruken ni Garma.
Idi Setiembre 7, nagbiahe ni Garma idiay Malaysia tapno makipagkita kadagiti sumagmamano nga opisyal ti International Criminal Court agsipud ta nakasagana daytoy a mangited ti testimonsia maibusor kenni sigud a Presidente Rodrigo Duterte.
