Tarigagay nga ipa-disbar ni acting Davao City Mayor Baste Duterte dagiti sumagmamano a nangangato nga opisyales ti pagilian, partikular da Department of Justice Secretary Jesus Crispin ‘Boying’ Remulla, Defense Secretary Gibo Teodoro, Justice Undersecretary Felix Ty, ken ni Prosecutor General Richard Anthony Fadullon.
Kas legal counsel ti nasao a Mayor ket personal nga impila ni Atty. Israelito Torreon sadiay Korte Suprema ti disbarment complaint kontra kadagiti nadakamat nga opisyales.
Kinuna daitoy a ti panangipila ti disbarment case ket maibasar ti kapasidad ti Mayor a kas paset ti pamilya Duterte.
Nupay nagkedkeden a mangibinglay pay ti kanayunan nga ammo na maipapan ti nilaon ti dokumento ket imbatad met ni Atty.Torreon a maipanggep dagitoy iti napasamak a pannakaarestar ken panangipatulod kenni sigud a Presidente Rodrigo Roa Duterte idiay The Hague, Netherlands.
Kabayatanna, ibilbilang met ni Department of Justice Sec. Jesus Crispin ‘Boying’ Remulla ti nasao a disbarment complaint kas ‘forum shopping’.
Innayon na pay a saan a daitoy ti umuna a gundaway a nakaawat isuna ti reklamo wenno kaso manipud ti nasao nga abogado.
