LA UNION – Nainget nga ipatpatungpal ti City Government of San Fernando ti curfew hours manipud alas 10:00 ti rabii agingga alas 4:00 ti bigat, partikular kadagiti menor de edad a matiliw kadagiti kalsada kabayatan ti nadakamat nga oras.
Segun ti City Police Station, dagus a maipakaammo kadagiti nagannak ti pannakatiliw dagiti annakda tapno maammoan ken mapalagipanda a saanda a palubosan a rumuar no oras ti curfew. No bilang awan dagiti nagannak, mapalubosan dagiti dadduma a kabagian wenno barangay officials a mangsundo kadagiti agtutubo manipud iti kustodia ti pulisya ken iyawid.
Maibasar iti report, rinabii nga agpatpatrolia dagiti pulis tapno masigurado nga awan ti agtalinaed nga agtutubo kadagiti kalsada kabayatan ti curfew hours.
Dagiti matiliw ket kadawyan a mapakdaaran ken mapaawid tapno maliklikan ti posible a peggad wenno insidente.
Pawagan ni Police Lieutenant Colonel Nara kadagiti nagannak, siguraduen nga adda dagiti annakda iti uneg ti pagtaengan kabayatan ti curfew.
Innayon na pay, pagrebbengan ti tunggal nagannak a mangiwanwan ken mangaywan kadagiti annakda tapno mataginayon ti kinatalged.
