LA UNION – Nangabak ti Ili ti Bacnotan kas Best Public Market iti Department of Trade and Industry (DTI) Consumer Welfare Month – Bantay at Bayanihan sa Merkado (BBM) Project a naangay ditoy syudad tu San Fernando City idi Oktubre 1.
Inawat da Market Supervisor Mx. Giovanni Rafael Partible, Municipal Administrator Marivic Estrada- Rimando, Municipal Environment and Natural Resources Officer Blossom Renion, Business Permit and Licensing Office Staff Ms. Elma Ancheta, Negosyo Center focal person Ms. Melody Abad, Asosasyon ng mga Tindera sa Bacnotan, La Union President Lorenzo Cariño ti pammadayaw manipud ti DTI.
Nakaawat pay iti Bacnotan Public Market kadagiti dadduma pay a panangbigbig pakairamanan ti Best Consumer – Friendly Market ken Plaque of Appreciation para iti suporta ken dakkel a kontribusion ti LGU Bacnotan iti pannakaipatungpal ti BBM Project.
Dagitoy a pammadayaw ket pammaneknek iti dedikasion ti Gobierno Lokal ti Bacnotan nga idadauluan da Mayor Divine ken Bise Mayor Francis a makintintinnulon kadagiti maseknan tapno maitandudo ti natalged, naurnos, ken addaan kaipapanan a merkado-publiko para kadagiti amin a consumers.
Indauluan ni DTI Acting Provincial Director Victoria Ordoño iti panangited dagiti nadakamat a pammadayaw.
Naimpusuan a nagyaman iti LGU Bacnotan iti DTI ken amin a kakaduada iti panakaipatungpal dagiti programa a nairanta para iti pagsayaatan dagiti consumers ken panangipaay iti nangatngato a tukad ti serbisio-publiko.
Agtultuloy iti panangitandudo ti lokal a gobierno kadagiti gannuat para iti panagrang-ay ti ekonomia ken merkado ti ili a pudno nga agserserbi kadagiti umili.
