Agtultuloy a bantayan dagiti autoridad iti kasasaad ti bagyo kalpasan a naingato ti signal No.4 iti Northern portion ken Signal No.3 met kadagiti nabatbati a paset ti La Union.
Segun ti kauddian report ti Philippine Atmospheric, Geophysical and Astronomical Services Administration (PAGASA), ti bagyo ket addan idiay Mayoyao, Ifugao ken manamnama a rumuar iti makinlaud a paset ti Sinait, Ilocos Sur inton rabii no saan nga agbaliw ti direksion na.
Sinigurado ti Provincial Disaster Risk Reduction and Management Office (PDRRMO) a nakasagana dagiti amin nga alikamen ken personnel para iti dagus a panagresponde iti aniaman nga insidente.
Nakaposisyon metten dagiti search and rescue retrieval teams ken 24/7 a nakabantay iti emegency hotline 911 para iti aniaman a tawag ti tulong.
Iti evacuation, nakasagana dagiti barangay halls, pagadalan, ken evacuation centers tapno umawat dagiti residente a maapektaran ti panaglayos ken landslide.
Partikular a naisagana dagiti regional evacuation centers idiay Agoo ken Bacnotan.
Kabayatanna, nabalakadan dagiti residente dagiti lugar a kadawyan a malaylayos kas iti Bangar ken Luna nga agridam ken dagos a sumurot kadagiti abiso dagiti otoridad.
Agtultuloy met ngna i-monmonitor ti PDRRMO dagiti landslide-prone areas iti kabanbantayan tapno masigurado a natalged dagiti komunidad.
Segun ti opisina, kangrunaan a panggep da iti panangipaay ti prayoridad iti kinatalged ti tunggal umili.
Pinaregta met ti gobierno dagiti amin a residente ti La Union nga agtalinaed nga alerto, dumngeg kadagiti damag, ken sumurot kadagiti pammilin ti LGU partikular no kasapulan ti umakar, tapno masigurado iti kinatalged ti tunggal maysa.###
