Imbatad ni Armed Forces of the Philippines (AFP) chief of staff General Romeo Brawner Junior a nainget a nakabantay ti Pilipinas kadagiti aksiyon ti China iti mapagsusupiatan a Scarborough Shoal.
Daitoy ket mainaig paylaeng ti kallabes a waragawag ti China seknan ti plano da a panangidatag ti Huangyan Island National Nature Reserve iti nasao a teritoryo ti Pilipinas.
Immunan a kinuna ti China idi napalabas a bulan ti Setyembre nga inaprobaran dan ti panangipasdek ti national nature reserve idiay Scarborough Shoal.
Nababalaw met daitoy iti biang ti Pilipinas ken inawagan ti plano ti China kas nalawag a gandat iti panag-okupa iti lugar.
Gapo kadaitoy ket nangipila metten ti Department of Foreign Affairs (DFA) ti diplomatic protest kontra China ken inawagan ti aksyon da nga ilegal, saan a nainkalintegan, ken panangrubo ti soberanya ti maysa a nasyon.
Segun iti AFP chief, napateg a malapdan a maulit ti napasamak idiay Mischief Reef nga aw-awagan pay ti Pilipinas kas Panganiban Reef.
Inokupa ti China iti Panganiban Rief idi dekada nobenta ken manipud idin ket pinalawa dan iti operasyon ken pinagbalin a base militar iti teritoryo nga uray pay daitoy ket sakopen paylaeng ti exclusive economic zone ti Pilipinas.
