Inwaragawag ti baro a nadutokan nga Ombudsman a ni Jesus Crispin ‘Boying’ Remulla a lukatan na iti isyu ti confidential funds ni Bise Presidente Sara Duterte.
Segun kenni Remulla, adalen na daytoy ken makikoordinar kadagiti adda iti takem a nakaiggem ti report a naidanon iti opisina.
Immunan nga insubmitir ti House Committee on Good Governance iti committee report daytoy iti Ombudsman kontra iti maikadua a Presidente, maipanggep iti saan nga nasayaat a panagusar ti pondo ti Department of Education.
Nairekomenda a makasuan ni Bise Presidente Sara Duterte ti reklamo kadagiti alegasion a technical malversation, perjury, bribery, ken plunder mainaig iti kontrobersial a confidential funds.
Innayon pay ni Remulla a namnamaen ti publiko nga agbalin isuna a ‘transparent’ ken ilungalong iti ‘accountability’.
Impasigurado na met iti panagbalin a silulukat ti opisina iti panangpamaysa daytoy a makabirok ti sungbat ken pagsungbaten dagiti karaman iti isyu ti korapsion.
Nadutokan ni Jesus Crispin ‘Boying’ Remulla kas baro nga Ombudsman kasukat ni Samuel Martires a nagleppas iti terminona idi bulan ti Hulyo, agdama a tawen.
Manipud kadagiti pito a nominado nga aplikante iti shortlist ti Judicial and Bar Council, ni Remulla iti pinili ni Presidente Ferdinand ‘Bongbong’ Marcos Jr. uray adda pay ti sumagmamano nga aldaw tapno panunuten no sino iti dutokanna kas baro nga Ombudsman.
Inton bigat ket agsapatan ni Remulla ken opisyal nga umalis iti kabaruan nga opisina inton aldaw ti Biyernes.
Kabayatanna, nadutokan met ni Justice Undersecretary Fredderick Vida kas officer-in-charge ti Department of Justice.###
