Nakitaripnong ti Bureau of Custom iti Independent Commission for Infrastructure seknan dagiti 13 a luxury cars a maipagarop a kukua dagiti agasawa a Discaya ken nakitaan ti kinakurang kadagiti dokumento.
Segun kenni BOC Commissioner Ariel F. Nepomuceno, dumanon ti 30 luxury cars iti nakumpiskar da ken 13 kadagitoy ket napaulogan ti “seizure order” a kayat na nga satwen ket awanan ti umno a dokumento isu a maiturongen iti kustodiya ti gobierno.
Addaan met ti nalinis nga papeles iti nabatbati a 17 luxury cars wenno nagatang kadagiti car dealers nga awanan ti dakes a track record, ngem saan pay a naisubli agsipudta madama pay laeng a maim-imbestigaran.
Ipamaysa ti ahensya dagiti inangkat wenno inimport dagiti kontratista tapno masigurado nga umno iti mabaybayadam a buwis ken addaan ti kumpleto a papeles.
Maipasidong metten iti panagamiris dagiti top 15 a kontratista nga dinakamat idi ti Presidente, ken nupay manamnama a bumayag iti proseso ket kasapulan daytoy a marugian.
Iti sabali a bangir, nalinis ken umno iti papeles dagiti lugan nga insuko ni Engineer Brice Hernandez, ngem saan pay a panawen nga isubli dagitoy kenkuana gapo ta maim-imbestigaran pay laeng no nalinis iti kuarta a pinanggatang kadagitoy.###
