Nadundunor dagiti lima nga indibidual kalpasan a nagsuwwek iti maysa nga helicopter iti parking lot ti Huntington Beach idiay California, idi Sabado ti malem (oras idiay Amerika).
Segun kadagiti opisyal ti syudad, napasamak iti insidente ti agarop alas-dos ti malem iti nagbaetan ti Twin Dolphins Drive ken Beach Boulevard.
Dagos a naiturong iti pagagasan dagiti dua a sakay ti helicopter ken dagiti tallo a nasugatan.
Awan pay met ti damag maipanggep iti kasasaad da.
Maibasar iti inisyal nga impormasion, iti helicopter ket konektado iti “Cars and Copters” event a nakaituding kuma a maangay ita nga aldaw.
Segun kadagiti testigo iti lugar a naalaan pay ti video, arigna naidumduma iti tayekk ti helicopter sakbay a natnag iti daga ken posible a naputed iti ipos daytoy wenno iti tail motor ti lugan.
Awan met ti bimtak ngem naipadamag nga adda ti timmagas a gasolina manipud iti helicopter.
Agtultuloy met iti ar-aramiden nga imbestigasion ti Federal Aviation Administration (FAA) ken National Transportation Safety Board (NTSB) maipanggep iti rason ti insidente.###
