Agpatingga laengen ita nga aldaw, Oktubre 15, iti ekstension ti online application para ti PNPA Cadet Admission Test (PNPACAT) 2025.
Napawaywayan ti 15 nga aldaw iti sigud a deadline a Setiembre 30 tapno makompleto ken maisubmitir dagiti aplikante dagiti dokumento tapno maiproseso.
Panggep daytoy nga extension a mangted ti kanayunan a panawen para kadagiti agtutubo a Pilipino nga agtarigagay nga agbalin a paset ti PNPA Class of 2030 – iti sumaruno nga henerasion dagiti lider ken panakabagi ti linteg nga agserbi iti pagilian nga addan ti tured, puso, ken integridad.
Iti PNPA Cadet Admission ket maitunos iti direktiba ni Presidente Ferdinand R. Marcos Junior nga addaan panggep a mangpapigsa iti ranggo dagiti panakabagi ti linteg ken seguridad ti publiko.
Impalagip ti PNPA kadagiti amin nga aplikante nga iti panagaramid ti account ket saan na kayat a sawen nga kompleton iti aplikasion.
Amin nga kasapulan a dokumento ket masapol a mai-upload iti PNPA Online Application System sakbay iti naituding a deadline.
Dagiti kasapulan a dokumento:
- -PSA Birth Certificate
- -Passport size wenno 2×2 a ladawan nga addaan ti name tag ken white background
- -Nakompleto a PNPA BMI Form (mabalin nga i-download ken kitaen iti klinika wenno health center) .
Para kadagiti kompleto a detalye ken pagannurotan ti aplikasion, maparegta kadagiti interesado nga aplikante a bisitaen iti opisial a website ken social media page ti PNPA.
Segun iti liderato ti akademia, maysa a gundaway para kadagiti agtutubo a mangipamaysa iti arapaapda nga agserbi iti pagilian, kas paset ti panangilungalong ti Bagong Pilipinas.###
