Impasigurado ti lokal a gobierno ti San Juan kabinnulig ti PNP ken nagduduma nga ahensia, iti kinasagana para iti masungad a Surfing Break 2025.
Iti naisayangkat a coordination meeting idi Lunes, natalantan dagiti naplano nga aktibidad, maipatungpal nga security measures, ken dadduma pay a panagsagana tapno agbalin daytoy a naannayas ken natalged.
Nagkiddaw da metten ti augmentation manipud La Union Police Provincial Office, Bureau of Fire Protection (BFP), ken Philippine Coast Guard para iti kanayonan a seguridad.
Impatungpal met ti LGU San Juan iti temporary traffic scheme tapno mapalag-an iti panagayus ti trapiko.
Temporario a maaramat iti shoulder mountainside ti national highway a pagparadaan dagiti bisita a saan a makausar iti pay parking wenno iti paradaan ti hotel da tapno mataginayon iti urnos ti entrance ken exit points.
Nupay awan ti espesipiko a bilang dagiti turista a manamnama a tumabuno, impanamnama ti San Juan Police Station nga umdasen dagiti naipasdek nga security measures tapno natalged iti amin.
Pinalagipan pay ti San Juan Police Station iti publiko a siguraduen ti kinatalged dagiti sanikuada ken saan nga agaramat kadagiti nginginaen nga alahas wenno aniaman a dakkel ti pategna tapno maliklikan ti pannakapukaw wenno panagtakaw.
Para kadagiti motorista ken turista, agannad ken liklikan iti agmaneho no addaan ti impluwensya ti arak wenno nabartek.
Ti Surfing Break ket maysa a tinawen nga aktibidad a paspasetan dagiti lokal ken ganganaet a turista tapno makita iti kinalaing dagiti surfers ken tagiragsaken dagiti aktibidad nga insagana ti lokal a gobierno ti San Juan.###
