Mamati ni International Criminal Court (ICC) Assistant to Counsel Kristina Conti nga addan ti 80% a matuloy iti kaso ni sigud a Presidente Rodrigo Duterte agturong ti panagusing.
Kasaruno daytoy iti desision ti international tribunal iti isyu ti hurisdiksion nga imbestigaran iti drug war a naipatungpal ti napalabas nga administrasion.
Segun kenni Conti, iti baro a desision ti ICC ket nalawag a senyales ti agtultuloy nga imbestigasion tapno naan-anayen a maamuan no sino dagiti dadduma pay a perpetrator wenno kadua ti sigud a presidente iti panangipatungpal ti nadara a gubat kontra droga.
Senyales met daytoy para iti posible a panagaplay ti kanayunan a warrant of arrest kontra kadagiti dadduma pay a personal.
Impaganetget na nga no adda man ti sumaruno a maarestar kas ni Senador Ronald Dela Rosa, nasaysayaat no maipatungpal a dagos ken isuko iti bagi na iti hurisdiksion ti korte ken kuwestionen daytoy iti merito ti kaso a maipasango kenkuana.
Mabalin nga aramiden daytoy ni Dela Rosa, kangrunaan no balak met ti kampo a kwestionaran dagiti warrant a posible nga nairuaren wenno iruar pay lang ti international tribunal.###
