Ngimmato iti presio dagiti sabong idiay ili ti Tubao, segun kadagiti sumagmamano a local flower vendors.
Malaksid ditoy ket kimmapsot ti panaglako da gapo ta immado ti bilang dagiti pada da nga aglaklako.
Nadlawan iti panagngato ti presio no idilig kadagiti napalabas a lawas. Manipud ti sigud a ₱100 ket adda itan iti nagbaetan ti ₱120 ken ₱150. Dagiti met dakdakkel nga arrangements nga agbalor ti ₱300 ket dimmanon itan iti ₱350.
Kenunada, agtalinaed a Baguio City iti kangrunaan a pagtaudan dagiti produkto da a sabong. Kinunada pay nga agpannuray pay laeng iti presio dagiti supplier a mangikeddeng iti presio kas maibasar iti demand ken supply iti merkado. Gagangay a bassit laeng ti itubtubo da tapno makasabay iti kompetision ken agtalinaed a makabael para kadagiti gumatang.
Impatungpal met ti LGU Tubao iti oras ti panaglako ita nga Undas. Mapalubosan laeng nga aglako dagiti vendors manipud alas siete ti bigat aginggana alas singko ti malem, maitunos kadagiti naituding nga oras ti panagbisita kadagiti sementerio tapno mataginayon iti urnos ken kinatalged ti publiko.
Iti laksid dagiti karit a patauden ti panagngato ti presio ken kompetision, agtaltalinaed nga aktibo dagiti aglaklako iti sabong ti Tubao iti panangipaay ti serbisio kadagiti umili a mangidaton iti sabong kadagiti pimmusay nga ay-ayatenda iti biag.
