Idauluan ti La Union Police Provincial Office (LUPPO) babaen ti liderato ni Provincial Director Police Colonel Redentor C. Ulsano, dagiti nadumaduma nga aktibidad a nairangta para iti pagsayaatan dagiti ubbing ti probinsia kas panagrambak ti National Children’s Month ita a bulan ti Nobyembre.
Maisayangkat ti selebrasion babaen ti panakitinnulong dagiti nadumaduma nga ahensia ti gobierno ken partner organizations.
Karaman kadagiti aktibidad nga iyuswat ti LUPPO ken dagiti police stations ket iti school visitations, dialogue seminar, lectures maipapan ti anti-bullying, children’s rights, ken dadduma pay nga isyu mainaig iti kinatalged ken pagimbagan dagiti ubbing.
Paset pay iti panagiwaras kadagiti leaflet, gift-giving activities para kadagiti ubbing nga adda kadagiti nasulinek a barangay, ken panangipaay iti grocery packs kadagiti napili nga indibidual ken pamilia.
Nakatuding met a maangay ti Family Day iti La Union Police Provincial Office, nga addaan panggep a mapatibker iti relasion ti pamilia ken maitandudo iti kinapateg ti panagkaykaysa iti panangsukog kadagiti agtutubo.
Ti tinawen a selebrasion ti Children’s Month ket agserbi kas palagip kadagiti amin a sektor ti kagimongan nga dagiti ubbing ket addaan karbengan a maaywanan, mangngegan, ken ti natalged ken nataripato nga aglawlaw.###
