Naan-anay ti panagsagana ti Schools Division Office (SDO) – Siudad ti San Fernando, La Union para iti Regional Launching ti National Children’s Month Celebration 2025 babaen ti panangidaulo ni Dr. Sheila Marie A. Primicias, CESO VI, Schools Division Superintendent.

Nagasat a napili ti SDO San Fernando City a kas host division ti regional celebration a pakaitampokan dagiti nadumaduma a programa ken aktibidad a nairanta a mangitandudo ti karbengan, kinatalged, ken pagimbagan dagiti ubbing.

Ti tinawen a selebrasion ket maangay babaen ti panakitinnulong ti Department of Social Welfare and Development (DSWD), Department of Education (DepEd), ken dadduma pay nga line agencies.

Ti tema ita a tawen ket “OSAEC-CSAEM Wakasan: Kaligtasan at Karapatan ng Bata, Ipaglaban!” a mangipamaysa iti kampania kontra iti Online Sexual Abuse and Exploitation of Children (OSAEC) ken Child Sexual Abuse or Exploitation Materials (CSAEM).

Kas paset ti selebrasion, mangisayangkat ti SDO San Fernando City ti motorcade ita nga aldaw, Nobiembre 5, babaen ti panakitinnulong dagiti nadumaduma nga division offices ti rehion.

Panggep daytoy nga ipakita ti panagkaykaysa iti panangsalaknib ken panangitandudo ti karbengan dagiti ubbing.

Karaman kadagiti napateg a programa nga insagana ti SDO mainaig iti tema ket ti:

  • Project Sagip – maysa a nagtitipon a programa ti PNP, LGUs, ken DepEd a mangipamaysa iti panangsalaknib kontra panagabuso, ken panangpapigsa iti panakaammo ti komunidad kadagiti isyu mainaig ti kinaranggas.
  • Safe Speak Online Platform – natalged ken silulukat a channel para kadagiti ubbing a mangiyebkas kadagiti kapanunotan wenno reklamoda, nga addaan ii panangiwanwan manipud kadagiti Heads ti pagadalan.
  • Spiritual and Moral Recovery Program – panggep a paunegen ti naespirituan ken moral a pundasion dagiti estudiante babaen ti tulong ti Religious Sector, kas kadua dagiti mannursuro iti panangiwanwan kadagiti agtutubo.

Segun kenni Dr. Primicias, napateg ti natibker a relasion iti nagbaetan dagiti institusion tapno masigurado ti holistiko a panagdur-as dagiti agtutubo — saan laeng nga iti edukasion no di pay ket iti moral, emosional, ken naespirituan nga aspeto.

Manamnama met a tumabuno dagiti Regional Directors ken dadduma pay a lider ti edukasion iti nadakamat nga okasion tapno talantanen dagiti best practices ken youth programs a mabalin nga ipatungpal kadagiti nadumaduma a siudad ken ili iti rehion.

Ti National Children’s Month ket tinawen a selebrasion a panggepna a bigbigen ti kinapateg dagiti ubbing iti kagimongan ken ipalagip iti pangrebbengan ti tunggal maysa — nagannak, mannursuro, gobierno, ken komunidad — a makiranget ken mangsalaknib kadagiti karbenganda.###