BR LA UNION – Kinumpirma ni Kentucky Govervor Andy Beshear nga uppat ti natay ken 11 dagiti nasugatan kalpasan a nagsuwek ken bimtak ti maysa nga UPS cargo plane, bayat nga agte-take off iti Muhammad Ali International Airport idiay Louisville, Kentucky, U.S.A.
Segun iti Federal Aviation Administration, napasamak ti insidente agarop alas 5:15 ti malem Eastern Time (November 4, 2025).
Makita iti nai-share a video, a nai-crash ken bimtak ti cargo plane ket nagparnuay ti napuskol nga apoy ken asok manipud iti left wing ti eroplano.
Iti nasao a video, makita a naisadsad ti nagsuwek nga eroplano iti arigna naluka-isan nga atep ti maysa a pasdek nga adda iti ungto ti runway ken nairaman a nauram ti dadduma pay a pasdek.
Full tank ti karga a fuel ti aircraft agsipudta non-stop nga ag-deretso koma idiay Honolulu, Hawaii.
Saan pay a nalawag nu anya ti makagapo iti napasamak nga insidente.
Kinuna ni Governor Beshear a daytoy ti maika-10 nga insidente ti panag-crash ti McDonnell Douglas MD-11 sipud idi umuna a mausar idi tawen 1991.
Naka-base iti kaadwan nga UPS cargo plane iti pasilidad da idiay Louisville, nga addaan ti ribu a mangmangged, aganay 300 ti inaldaw a flights ken agikar-karga ti nasurok 400,000 packages ti uneg laeng ti maysa nga oras.(AP)
