BR LA UNION – Insubmitir ti Office of Public Counsel for Victims (OPCV) ti International Criminal Court (ICC) ti rekomendasyon ti dua nga eksperto iti neuropsychology a mangbukel iti baro a panel a mangsukimat iti salun-at ti panunot ni sigud a Presidente Rodrigo Duterte tapno maammuan no maikari a maidarum.
Iti lima a pinanid a dokumento a naipila idi Nobyembre 10, 2025, kinuna ni Paolina Massidda, Principal Counsel ti OPCV nga addaan iti umdas a kredensiyal ken kapadasan dagiti dua a nairekomendar a mangsukimat kenni Duterte.
Kinuna ti OPCV a pinilida dagiti eksperto maibasar iti kuwalipikasyon ken kabaelanda, pakairamanan ti kinalaingda iti Ingles ken ti lengguahe a nakaisuratan ti sumagmamano kadagiti immun-una a medical findings ni Duterte.
Ti ICC ket sigud a nangdutok iti tallo a kameng ti panel a buklen ti maysa a forensic psychiatrist, maysa a neuropsychologist, ken maysa nga eksperto iti geriatric ken behavioral neurology.
Nupay kasta, kiniddaw ti kampo ni Duterte ti pannakaikkat ti maysa kadagiti eksperto, gaputi maipagarop a kinakurang iti kapadasan ken posible a kaawan ti impartiality daytoy.
Iti mosyon a naipila idi Nobyembre 7, impaganetget ni Atty. Nicholas Kaufman, lead counsel ni Duterte, a rumbeng nga ibabawi ti Pre-Trial Chamber ti mandato ti eksperto ken saan a palubosan a mairaman iti listaan dagiti eksperto ti ICC.
Kas resultana, imbilin ti Pre-Trial Chamber I iti Registry a mangisubmitir iti baro nga shortlist dagiti eksperto iti neuropsychology.
Iti naisina a dokumento a naipila idi Nobiembre 10, kinuna ni Massidda nga italek da iti Chamber iti maudi a desisyon ngem impaganetget na a nasken a mairaman ti neuropsychologist iti panel tapno masigurado ti patas a panangtingiting iti kasasaad ti sigud a presidente.
Maipalagip a naaresto ken naiturong ni Duterte idiay The Hague idi Marso 12, ken naudi a nakita iti maysa a teleconference idi Marso 14.
Naitantan ti confirmation of charges hearing nga orihinal a naituding idi Setyembre 23, kalpasan nga impaganetget dagiti abogado na a saan a fit to stand trial gapu iti maipagarop a panagkapsot ti cognitive abilities daytoy.
