Narsuod ti Hongqi Bridge idiay Sichuan, China kasaruno laeng ti uppat a bulan nga inagurasyon na ita a tawen.
Ti nasao a rangtay ket agatiddog ti 758 a metro ken ipanpannakkel ti Partido Komunista ti China a kas maysa kadagiti top engineering achievements da.
Sakbay a narsuod ket nadlawanen dagiti motorista nga adda iti mapagduaduaan a garaw iti rangtay isu a napilitan dagiti otoridad nga ipaserra daitoy.
Kabayatanna, awan met iti naipadamag a nadangran iti insidente.
Dagiti marmarsuod a rangtay ken dadduma pay nga imprastraktura ket masansan idiay China.
Ita laeng a tawen ket natay dagiti 12 a trabahante kalpasan a natupakan ida kadagiti debris gapo iti narsuod a Sichuan-Qinghai railway idi Agosto 22.
Idi met napalabas a tawen ket 11 a tattao ti natay idi narsuod ti highway bridge idiay Shaanxi province.
