Impeksa ni Press Officer Usec. Claire Castro a sakbay a sumungbat ti Malacañang iti waragawag ni Zaldy Co ket nasaysayaat no palpasen na pay amin dagiti nagsasaruno a video statements.
Segun kenni Castro, kadkadlaw dagiti “inconsistencies” manipud Video 1 aginggana 5, karaman iti nagduduma nga hairstyle ken langa ni Co a mangipakpakita nga inaramid na daytoy iti nagduduma nga aldaw ken mabalin a nakadependir iti reaksion ti publiko.
Dinakamat ti Press Officer Undersecretary nga iti umuna a video, saan a dinakamat ni Co iti maipagarup a transaksion idi 2022, ken rinugian na laeng iti estoriana iti tawen 2024.
Kenunana, idi nadillaw dagiti saan a panagtunos ken kellaat a nagbaliw iti salaysay na kadagiti sumarsaruno a video.
Innayon pay ni Castro, saan a maliklikan iti panagdudua no ni Co iti mismo nga adda kadagiti videos gapo iti pabaliwbaliw a langa ken mensahe.
Nupay kasta, impasigurado na a sungbatan ti Palasyo dagiti pammabaol kalpasan a mairuar ni Co iti kumpleto nga akusasionna.
