Makalawas laeng kalpasan ti panagperma ti Thailand ken Cambodia iti ceasefire deal idiay Malaysia nga indauloan pay ni United States President Donald Trump ket napartuat manen ti riribuk ti nagbaetan dagiti nasao a pagilian.
Agpegpeggad ita ti inlungalong ni Trump a peace deal kasaruno a dimmanon ti 12 nga indibidwal ti pimmusay ken rinibu a residente ti nabakwit gapo iti rinnupak ti Thailand ken Cambodia.
Maipalagip a dimmanon ti aganay 50 nga indibidwal ti natay ken 300k met ti nabakwit gapo iti lima nga aldaw a gera da idi laeng bulan ti Hulyo sakbay a nakiballaet ni Trump ken intandudo iti ceasefire.
Gapo kadayta ket inaklon ni Trump iti panagpasardeng kadagiti walo a gera manipud pay idi Enero, nupay imbatad na a dagiti dadduma a riribuk ket mabalin nga agtultuloy ti sumagmamano pay a panawen.
Manipud idi inwaragawag na ti multi-phase Gaza ceasefire deal idi Oktubre ket nakapatayen ti Israel ti nasurok nga 400 a Palestino gapo iti panaglabsing iti katulagan. Ni Trump metlaeng ti nakiballaet ti Democratic Republic of the Congo ken Rwanda ngem agingga ita ket saan latta nga agsardeng dagiti dua iti rinnupak da.
Ti kabaroan a panagsinnukat ti Cambodia ken Thailand kadagiti puersa militar ket mangpegpeggad iti binukel ni Trump a katulagan iti kinakapia. Immun-unan daitoy a napagtulagan idi Hulyo ken napermaan iti napalawa a bersyon idi Oktubre.
