Agtaltalinaed a nabuntog iti panaggastos dagiti consumers iti laksid ti umadanin nga aldaw ti Paskua, kas maibasar iti real-time monitoring ti Philippine Amalgamated Supermarkets Association (PASA).
Segun kenni PASA President Steven Cua, saan pay unay a nakapagrehistro dagiti supermarket, mall, ken retail outlets dagiti dadakkel a bulto dagiti produkto a magatgatang iti agdama.
Ti laeng nailista a gumatgatang ti bultuan ket dagiti dadakkel a kumpania ken negosyante a mangipaay ti Christmas giveaways kadagiti empleyado.
Nupay kasta, namnamaen ti grupo a mangrugi nga agdopodop dagiti consumers kadagiti retail outlets ken malls, uppat nga aldaw wenno nabab-baba pay sakbay ti Paskua gapu ta nasanay iti kaaduan ti rush buying bayat nga dagiti dadduma ket awan ti umdas nga orasda a gumatang gapu kadagiti trabahoda.
Iti agdama, saan pay a kasapulan nga ingato iti presio dagiti magagatang. Agtaltalinaed nga umdas iti supply ken stock dagiti produkto tapno sungbatan iti demand wenno pagkasapulan iti pakabuklan nga holiday season.#
