Saan a makaawid ita a Paskua iti contractor a ni Pacifico “Curlee” Discaya ken tallo pay a sigud nga opisial ti Department of Public Works and Highways (DPWH) idiay Bulacan kalpasan a pinagkedkedan ti Senado iti kiddaw da para iti Christmas furlough.
Segun kenni Sen. Panfilo “Ping” Lacson, inbasura da iti request agsipudta inkonsiderar da iti seguridad dagitoy ken iti posibilidad a mairuar dagiti arrest warrants kontra kenkuada sakbay ti Paskua.
Inlawlawag ni Lacson a nangatngato iti peggad ti panagtakas nu palubusan a temporario a makawayawaya dagiti detainee, kangrunaan ta adda ti manamnama nga aksion ti Office of the Ombudsman.
Iti desisyon ket inaprubaran ni Senate President Vicente Sotto III.
Iti agdama, pinalubusan da laeng ti uppat nga agsimba iti uneg ti Senado ken umawat ti bisita manipud kadagiti pamilia da bayat nga agtultuloy iti imbestigasion iti maipagarop nga anomalya iti flood control projects.
