Agtalinaed a nakaalerto iti Philippine National Police (PNP) iti intero a pagilian manipud iti panawen ti Paskua agingga iti Baro a Tawen 2026.
Daytoy ket tapno masigurado iti kinatalged kti publiko kabayatan ti selebrasion.
Segun kenni PNP Chief Police Lieutenant General Jose Melencio Nartatez Junior, nagbalin a naballigi iti siam nga aldaw ti Simbang Gabi ken awan iti nairekord nga insidente a nakaapektar iti kappia ken kinatalged dagiti nakimisa.
Pinadayawan na iti dedikasion ken serbisio dagiti pulis iti panangtaginayon ti seguridad kadagiti simbaan ken iti panangipatungpal ti linteg.
Nupay kasta, impaganetget ni Pltgen. Nartatez nga ad-adda ti pannakumikom ti PNP iti panawen ti Paskua ken Baro a Tawem no idilig iti Simbang Gabi.
Daytoy ket gapu iti manamnama a panagngato dagaiti insidente a mainaig iti panagusar ti paputok.
Nabilin dagiti amin nga istasion ti pulisya iti intero a pagilian – a papigsaen iti kampania kontra iti ilegal a panagikut ken panaglako kadagiti armas, kasta met iti nainget a pannakaiparit kadagiti ilegal a paputok.
Karaman met iti direktiba ti panangipamaysa iti online a panalako tapno malapdan iti panagwaras dagiti napeggad a produkto.#
