Inwaragawag ni Batangas 1st District Rep. Leandro Leviste a maipagarup nga inasekgan isuna ti maysa nga indibidual a nagpabigbig kas staff ni Nueva Ecija Rep. Mikaela Suansing ken nangidiay dagiti budget items nga aggatad ti ₱151 million kas “incentive” sakbay iti binotos ti 2026 national budget.
Segun kenni Leviste, maipagarup a nagkiddaw ti nasao nga staff a nagpabigbig kas “Atty. Jolina” ti limed a panagtataripnong ken nangiparang ti dokumento maysa a lawas sakbay iti budget vote.
Imbinglay ti Batangas 1st District Representative iti ladawan ti papel a nakalanadan dagiti alokasion manipud kadagiti nadumaduma nga ahensia, kasta met ti naisina a dokumento a maipagarup a naipakita kadagiti dadduma a kongresista nga addaan ti pakabuklan a ₱250 milyon.
Saan na nga i-kueskuestion iti mismo nga alokasion no di ket iti kinaawan ti nalawag a palawag ken transparency no apay ta adda ti maipapaay nga “incentive” sakbay iti binotos ti budget.
Kenunana pay a no maar-aramat iti pondo ti pagilian kas insentibo kadagiti mammanday-linteg sakbay iti panagaprobar ti 2026 budget ket rumbeng a maamwan daytoy ti publiko kangrunaan ta manamnama a ratipikaran ti Kongreso iti budget inton sumaruno a lawas.
Awan pay ti statement ni Representative Suansing wenno sinoman kadagiti staff-na.#
