Nagdupodop dagiti tattao kadagiti bus terminals nga agur-uray kadagiti pagluganan da nga agawid dituy Siyudad ti San Fernando idi kalman, Disiembre 31, bisperas ti Baro a Tawen.
Daytoy ket gapu ta agkurkurang wenno bassit dagiti nagbiahe a bus, ken limitado a unit ken schedule ti panagbiahe.
Kaadduan kadagiti pasahero ket agsubli kadagiti bukodda a probinsya ket naguray ti mano a oras sakbay da a nakalugan.
Kinuna ti terminal management ken sumagmamano a bus operators a saan nga umdas iti bilang dagiti bus gapu iti panagakar dagiti agbibiahe ita a panawen ti bakasion.
Balakad ti management kadagiti pasahero a nasapa nga agturong kadagiti terminal, mangitukon ti umdas nga oras para iti panagbiahe, ken makiuman kadagiti bus companies para kadagiti updated schedules.
Iti sabali a bangir, agrekreklamo dagiti pasahero gapu ti maipagarup a nangato a plete kadagiti sumagmamano a rent-a-van.
Segun kadagiti pasahero, nangatngato ti plete maiyarig iti regular a plete, ngem gapu ta kasapulan da a makaawid ket kapilitan nga agbayadda gapu iti panagkurkurang ti lugan.
Impalagip dagiti otoridad kadagiti operators a tungpalenda ti umno a plete ken paregtaenda ti publiko a mangipadamag kadagiti aglabsing.###
