Imbutaktak ni Batangas 1st District Representative Leandro Leviste a nakaawat ti ₱2 million tunggal 318 a kongresista kas Christmas Bonus.
Segun kenni Leviste, nairana daytoy iti panagbotos para ti 2026 General Appropriations Bill.
Palawag ti mammanday-linteg a malaksid iti sueldo ti tunggal miembro ti Kamara, adda pay ti maaw-awat da a binulan a pondo para ti Maintenance and Other Operating Expenses (MOOE) ti opisina a nasurok-kumurang maysa a million.
Inwaragawag na idi napalabas nga aldaw a naikkan isuda ti “extra” karaman dagiti bonosus a nairuar kagiddan ti binnoto para ti 2026 budget.
Inaklon ni Leviste a naammuan na laeng iti maipapan ti bonus manipud kadagiti dadduma a mammanday-linteg.
Tunggal kongresista ket kumitkita ti ₱300,000 tunggal bulan kas sahod.
Rumrumuar nga iti take home pay ti tunggal kongresista no pagtipunen dagiti operating expenses ken sueldo dagiti 318 a mammanday-linteg ket dumanon ti ₱1 billion.
Inaramid ni Leviste iti waragawag kagiddan ti panang-kuestiona iti sibubuo a ₱10.5 billion wenno agarup ₱7.8 billion a maitukon iti MOOE, a mangipasimudaag a karaman iti pondo iti umento iti bayad para kadagiti bukodda a bonuses, karaman ti ₱2 million para iti tunggal kongresista.
Inlawlawag ni House Deputy Speaker Ronaldo Puno a saan daytoy a Christmas bonus no di ket kanayunan a panagpondo para ti Christmas requirements kadagiti distrito.
Impaganetget met ti mammanday-linteg nga iti pondo ket dokumentado ken subjected iti government audit.
Pinaglibakan met ni House Committee on Appropriations chairman Mikaela Suansing iti alegasion ni Leviste a nakaawat ti P2 million a Christmas bonus iti tunggal kongresista.
Inlawlawag met ni Suansing nga awan ti impluwensya wenno panangipilit a napasamak manipud iti house leadership tapno allukuyen iti siasinoman a kongresista nga agbotos ti pabor iti singasing a budget para inton sumaruno a tawen, ken awan ti aniaman nga insentibo a maited kasukat ti botos dagiti miembro.###
