Pinasingkedan ti Bureau of Immigration a nai-deporten pasubli idiay Russia ti Russian vlogger a ni Vitaly Zdorovetskiy.
Segun ti ahensia, naglugan ni Zdorovetskiy iti Iraero flight nga agturong idiay Irkutsk idi Sabado.
Imbilin ti BI Board of Commissioners ti pannakaideportana idi Disiembre 17 kalpasan a naideklara isuna kas undesirable alien.
Nagtaud ti deportation order kadagiti nadumaduma a reklamo a naipila kontra iti 33-anyos a vlogger mainaig ti harassment ken kinakurang ti panagraemna kadagiti sumagmamano a Filipino.
Immuna a naaresto ni Zdorovetskiy idi Abril, napalabas a tawen.
Nabigbig isuna iti panangipablaak kadagiti prank videos iti social media, karaman iti panangriribuk ti maysa a security guard, panangsao ti dakes iti maysa a Filipina a nakasuot ti face mask, panagtakaw ti industrial electric fan, ken panangala ti maysa traysikel ken idi agangay ket naidungpar iti nakaparada a Jeep.
Kabayatan ti inquest proceedings, inaklonna dagiti madi nga inaramidna ken naibalud daytoy iti BI Warden’s Facility ti Camp Bangong Diwa a masarakan idiay Taguig.
Ginandatna iti agpiansa ngem saan na nga impalubos ti Bureau of Immigration.
Kalpasan ti deportasion ket innayon ti Bureau of Immigration iti blacklist ti nagan ni Zdorovetskiy.###
