Agtultuloy ti search and rescue operations nga isaysayangkat ti Philippine Coast Guard (PCG) para kadagiti biktima ti trahedia ti pannakalned ti motorboat a MBCA Amejara ken ti barko nga MV Devon Bay.
Saan nga agsardeng dagiti PCG personnel iti panangbirok ken panangisalakan kadagiti posible a nakalasat dagiti dua nga insidente.
Segun ti statement ni PCG spokesperson Captain Noemi Cayabyab, nakumpirmar a lima a bangkay iti narekober manipud iti didigra ti MBCA Amejara.
Dagiti natay a biktima ket naturong idiay Davao City para iti proseso ti pannakabigbig ken maammuan iti kinasiasinoda babaen kadagiti kabagianda.
Manipud iti pakabuklan a 16 a nakasakay iti nadakamat a bangka, maysa laeng iti nairekord a naisalakan, bayat nga agtultuloy ti panagbirok dagiti autoridad kadagiti sangapulo pay a mapukpukaw.
Tapno mapapartak ti panagbirok, maisaysayangkat iti aerial survey iti lugar ti pasamak.
Makitinnulong met ti PCG kadagiti nadumaduma nga ahensia ti gobierno ken volunteer groups, a pakairamanan ti Philippine Navy, Office of Civil Defense (OCD), Local Government Units (LGU), Philippine National Police (PNP), ken dagiti volunteer fisherfolk nga asideg iti lugar.
Segun kadagiti report, nasarakan dagiti bangkay iti kaadayo a 65 agingga 68 nautical miles iti asideg ti Balut Island.
Agtultuloy iti panagregget ti PCG a mabirukan dagiti mapukpukaw nga indibidual iti kabiitan a panawen.###
