Impadamag ti Main Intelligence Directorate ti Ministry of Defense ti Ukraine a nakapatay da iti maysa a Filipino combatant nga agserserbi iti Russian Armed Forces idiay Donetsk region.
Ibilbilang ti Ukraine iti Pilipino a kas foreign mercenary ket binigbig ti military intelligence officers ti bangkay na a managan ti “John Patrick” – residente ti Republic of the Philippines – a makiraraut iti biang ti aggressor state.
Nagserbi ni John Patrick iti 9th Assault Company ti 3rd Battalion, 283rd Regiment, 144th Motorized Rifle Division, 20th Combined Arms Army iti Russian Armed Forces.
Kas kadagiti sabali pay a foreign mercenaries, napapatay isuna babaen iti maawagan a “meat assault” idiay Novoselivka, Kramatorsk District, Donetsk.
Addaan laeng ti imet ni alias John Patrick a maysa nga rifle, ammunition, ken pidaso ti papel a nakasuratan ti unit number, phone number, ken ti nagan ti commander na; pulos a saan na nga ammo iti lengguahe ti Ruso.
Segun kadagiti datos a nagun-od manipud iti electronic devices ti Pilipino, makalawas laeng iti impaut iti basic training na ken naipatulod a dagos isuna iti front line.
Nakaam-ames ken nabuntog iti pannakatay ti Pilipino sadiay forest belt agsipud ta awan pulos iti inyuswat nga evacuation plan iti biang dagiti soldado ti Russia.
Pagaammo a pinainget pay ti Russia iti criminal practice da iti panag-recruit kadagiti foreign nationals ken labor migrants a mangallilaw iti nasayaat a panggedan ngem iti agangay ket maipatulod da met gayam iti frontline ti gyera.
Gapo kadaitoy ket nagpakdaar ti Main Intelligence Directorate ti Ministry of Defense of Ukraine (HUR) kadagiti gangganet nga adalen a nalaing iti maidiaya a trabaho kadakuada idiay Russia tapno maliklikan iti illegal employment.
